Logo

" Ferzye " tortu


Ərzaqlar:

Biskvit üçün:
Yumurta - 6 ədəd
Şəkər tozu - 2 stk.
Un - 2 stk.
Qabartma tozu - 10 q
Vanilin şəkəri - 10 q

Krem üçün:
Kərə yağı - 100 q
Yumurta - 6 ədəd
Şəkər tozu - 1,5 stk.
Un - 3 x.q.
Süd - 2,5 stk.

İçlik üçün: 
Çiyələk - 1 kq
 
Hazırlanma qaydası:
Biskviti hazırlamağımız üçün ilk öncə yumurtaları şəkər tozu ilə birləşdirib, üzərinə vanilin şəkəri əlavə edib, 3-4 dəqiqə ərzində mikserin vasitəsi ilə çalırıq.

Alınan qarışıma un və qabartma tozunu əlavə edib, yenidən 3-4 dəqiqə ərzində kütləni çalırıq.

Öncədən yağlanmış bişirmə formamıza hazırladığımız xəmiri boşaldırıq. Sobanı 180 dərəcəyə qədər isidib, biskvitimizi 40 dəqiqə ərzində bişiririk.

Hazır biskviti sobadan çıxardığımızdan sonra soyumasını gözləyirik. Bu zaman ərzində tort üçün kremimizi hazırlaya bilərik.

Kremi hazırlamaq üçün yumurtaları şəkər tozu ilə birləşdirib, yüksək sürətdə çalırıq. Qarışıma un və südü əlavə edib, kütləni yaxşıca qarışdırırıq. Hazırladığımız qarışımı orta hərarətli odda dayanmadan qarışdıraraq, qaynamasını gözləyirik. Kütlə qatılaşana kimi qarışdırmağa davam edirik. Qatılaşmış krem soyuyandan sonra, üzərinə yumşaq kərə yağını əlavə edirik.

Kremi mikserin vasitəsi ilə yüksək sürətdə 4-5 dəqiqə ərzində çalırıq. Kremimiz hazırdı.

Soyumuş biskvitimizi 3 eyni ölçülü qatlara bölürük. Hər bir qatın üzərinə kremimizi yayırıq. Çiyələkləri nazik hissərə doğrayıb, kremli qatın üzərinə düzürük. Bu şəkildə tortumuzu "yığmağa" başlayırıq.

Hazır tortun üzərinə zövqünüzə görə çiyələklər ilə bəzək verə bilərsiniz.